Die Bo-Karoo Opleiding se Tuisversorgingstudente het drie dae saam met lewensafrigter, Dia van Staden deurgebring, terwyl daar onder andere oor kommunikasie, emosionele intelligensie, selfbeeld, konflikhantering en persoonlikhede gesels is. “Die groep studente het veral ywerig aan die bespreking oor persoonlikhede deelgeneem en het die rolspel tydens die kommunikasiesessies insiggewend gevind,” vertel Dia. Sy vertel dat praktiese voorbeelde en rolspel vir hulle waardevol was omdat dit van papier na praktyk oorgedra is. Die studente het getuig dat die telefoniese rolspelsessies vir hulle baie moontlike kwelvrae van kliënte, en hul reaksie daarop, demonstreer het. Die meerderheid melankoliese persoonlikhede het duidelik na vore gekom toe daar oor konflik gesels word, want hulle wou nie graag die tema verbaal ontdek nie. “Die wegskram van konflik en 'n hoë persentasie wat eerder kompromieë sal aangaan, kon egter verduidelik word sodat daar na 'n oplossing van konflik gewerk kan word.” Dia erken dat 'n hoë vlak van emosionele intelligensie soms benodig word om konflik sonder aggressie of 'n heftige humeur op te los. Dia deel dat dié groep met hulle optrede oor die drie dae getoon het dat hulle meer kwaliteit verhoudings wil bou. Volgens Dia het die studente se terugvoer daarop gewys dat hulle elkeen uitsien na 'n gelukkige en positiewe toekoms. “Die meerderheid het verwoord dat hulle met mense wil werk en 'n verskil wil maak in mense se lewens. Dit is noemenswaardig,” voeg Dia by.
