1.Hoe oud is jy en wat is jou grootste doelwit in die lewe?
Ek is 18 jaar oud en word in November 19. My grootste doelwit in die lewe is om die persoon te word waarvoor God my geskape het en om die talente wat Hy vir my gegee het, tot Sy eer te gebruik. Ek wil nie net suksesvol wees nie, maar ook ’n inspirasie vir ander wees en jongmense help om in hulself te glo, hul uniekheid te omhels en te besef dat hulle ’n doel het.
2. Jy is eienaar van J’Élan Dansakademie. Waar kom die naam vandaan? Die “J” staan vir Janél, maar ook vir Jesus, want Hy is die middelpunt van alles wat ek doen. Ek wil hê dat Hy altyd die leier van my akademie moet wees. “Élan” beteken entoesiasme, energie en passie, wat presies weerspieël wat ek deur dans en modelwerk wil uitleef.
3. Wat is die drie belangrikste eienskappe wat jy in vriende soek?
Die drie belangrikste eienskappe vir my is eerlikheid, lojaliteit en opregtheid. Ek waardeer mense wat hulself kan wees, wat eerlik met my is en wat daar is vir my, nie net wanneer alles goed gaan nie, maar ook wanneer die lewe uitdagend raak.
4.Hoe belangrik is familie vir jou?
Familie is vir my ongelooflik belangrik. Hulle is deel van my fondament en die mense wat ’n groot rol speel in wie ek vandag is. Ek glo dat familie nie net gaan oor bloedbande nie, maar ook oor liefde, ondersteuning, vergifnis en om daar te wees vir mekaar. Ek wil ook graag iemand wees op wie my familie trots kan wees en wat liefde en ondersteuning teruggee.
5.Wat is jou stokperdjies?
Dans en modelwerk is beslis twee van my grootste passies. Ek dans al van die ouderdom 3 af en dit is ’n baie groot deel van wie ek is. Ek geniet dit om myself deur dans uit te druk en om my kennis met ander kinders te deel. Om my eie dans- en modelakademie te bestuur, gee my ook die geleentheid om ander se talente te help ontwikkel. Ek geniet modelwerk, fotosessies, kompetisies en kreatiewe projekte. Ek hou ook van visvang.
6.As jy ’n dier kon wees, watter een sou jy kies en waarom?
Ek sou ’n sneeuluiperd kies, omdat dit my herinner dat ’n mens selfs in moeilike omstandighede kan aanhou en jou pad vorentoe kan vind. Ek glo dat die moeilike tye waardeur ons gaan, ons nie hoef terug te hou nie, maar ons kan leer om sterker te word en met geloof aan te hou.
7.As jy vir een dag enigiets kon doen sonder om te dink aan geld, mislukking of wat ander sê, wat sou jy doen?
Ek sou graag ’n groot dans- en modelvertoning wou aanbied waar kinders van regoor Suid-Afrika die geleentheid kry om hul talente op ’n verhoog te wys, ongeag waar hulle vandaan kom of wat hul omstandighede is. Ek sou wou hê elke kind moet die kans kry om te ervaar hoe dit voel om in hulself te glo, hul drome na te jaag en trots te wees op wie hulle is.
8.Waar en wanneer voel jy die meeste soos jouself?
Ek voel die meeste soos myself wanneer ek dans, wanneer ek met die kinders by my akademie werk en wanneer ek tyd saam met God kan deurbring. Dans is al van kleins af deel van my lewe en gee my ’n manier om uit te druk wat ek soms nie in woorde kan sê nie.
9.Wat is volgens jou die grootste uitdaging of bekommernis wat jongmense vandag in die oë staar?
Die druk om in te pas en aan ander se verwagtinge te voldoen. Sosiale media laat dit soms lyk asof almal se lewens perfek is, en dit kan veroorsaak dat jongmense hulself met ander vergelyk en voel dat hulle nie goed genoeg is nie. Daar is ook baie druk om suksesvol te wees, mooi te lyk en alles reeds op ’n jong ouderdom uitgewerk te hê. Ek dink ons moet jongmense meer herinner dat elkeen se pad anders lyk en dat hulle nie hul waarde aan ander se goedkeuring hoef te meet nie. Dit is belangrik om te weet wie jy is, waarvoor jy staan en waarin jy glo.
10.Waarvoor is jy die dankbaarste? Waarom?
Ek is die dankbaarste vir God se genade, leiding en getrouheid in my lewe. Ek glo nie ek het gekom waar ek vandag is net deur my eie krag nie. Daar was uitdagings en moeilike seisoene, maar ek kon telkens terugkyk en besef dat God my daardeur gedra het. Ek is ook baie dankbaar vir die geleentheid om my passie vir dans en modelwerk uit te leef en om deur J’Élan ’n verskil in kinders se lewens te maak.
